यो फिल्म बक्सअफिसमा कमजोर बन्दाको प्रत्यक्ष फाइदा दीपेन्द्र के. खनालको फिल्म ‘आमा’ लाई मिलेको छ । चौथो हप्ताबाट ‘सेन्टी भाइरस’ मल्टीप्लेक्सहरुबाट उत्रिँदा ‘आमा’ ले भने आफ्नो दबदबा कायमै राखेको छ । यी दुई फिल्म एकसाथ मैदानमा उत्रिएका थिए । चौथो हप्तामा क्यूएफएक्स चेनमा ‘आमा’ ले ७ सोज पाएको छ । अघिल्लो हप्ता फिल्मलाई १६ सोज थियो । माउथ पब्लिसिटी तगडा भएका कारण यो फिल्म लामो रेसको घोडा बन्न सफल भएको हो । तर, संसारभर फैलिएको कोरोना भाइरसका कारण अहिले यो फिल्मले पनि दर्शकको राम्रो साथ पाउन सकेको छैन । डब्लूएचओले नेपाल कोरोनाको उच्च जोखिममा रहेको बताएपछि केही दिनयता हलमा दर्शकको उपस्थिति न्यून छ । जसको असर ‘आमा’ को व्यापारमा परेको छ ।

कोरोनाको त्रासका कारण यो हप्ता हलमा नयाँ नेपाली फिल्म छैनन् । आज शुक्रवारबाट फिल्म ‘म यस्तो गीत गाउँछु २’ आउँदै थियो । तर, कोरोनाकै कारण फिल्मको रिलिज स्थगित भयो । यद्यपि, शुक्रवारबाट नेपाली हलमा हलिउड फिल्म ‘ब्लड सट’ र बलिउड फिल्म ‘अंग्रेजी मिडियम’ प्रदर्शनमा आएका छन् । यी दुई फिल्मलाई शुक्रवार विहान दर्शकको औसत साथ मिलेको छ ।