मैदानमै फाईट खेलेका मनाङ र मछिन्द्रका ६ खेलाडीलाई प्रतिवन्ध

नुवाकोट । सहिद स्मारक ए डिभिजन लिगको मनाङ र मछिन्द्रबीचको खेलमा विवादमा उत्रने ६ खेलाडीलाई प्रतिबन्ध गरिएको छ ।अखिल नेपाल फुटबल संघ एन्फाले खेल लगत्तै झै–झगडामा उत्रने ६ खेलाडीलाई लिगकाे खेलमा प्रतिबन्ध लगाएको छ ।

गत मंगलबार लिगमा मनाङ र मछिन्द्र मैदान उत्रिएका थिए । दुवै टिमले निर्धारित समयमा २–२ गोलको बराबरी खेलेका थिए । खेल लगत्तै दुवै टिमका खेलाडी विवादमा उत्रदै मैदानमा झगडा गरेका थिए ।खेलाडी हातपातमा उत्रिएपछि प्रहरी लगाएर मैदान खाली गराउनु गरेको थियो । पछिल्लो समय अनुशासनको बिषयमा कडा निर्णय गर्दै आएको एन्फाले दुवै क्लबका ६ खेलाडी र एक अफिसियललाई लिग खेलमा प्रतिबन्ध सहित आर्थिक जरिवाना गर्ने निर्णय गरेकाे हाे ।

एन्फाको अनुशासन कमिटिले मनाङ र मछिन्द्रका समान ३ खेलाडीलाई आर्थिक जरिवाना सहित प्रतिबन्ध लगाएको छ । जसमा मनाङका एक अफिसियल समेत रहेका छन् । एन्फाका अनुसार मनाङका जगजित श्रेष्ठलाई ५ खेलको प्रतिबन्ध सहित १० हजार रुपैयाँ जरिवाना गरिएको छ । अशोक बराललाई ६ खेल सहित १० हजार जरिवाना गरिएको छ । उनले राताे कार्ड समेत खाएका थिए । साेही कारण उनले लिगका ६ खेल गुमाउनेछन् । मनाङकै रञ्जन विष्टलाई दुई खेलको प्रतिबन्ध गरिएको छ ।

यस्तै, मछिन्द्रका दिपक राई, देबेन्द्र तामाङ र विजय धिमाललाई समान २ खेलको प्रतिबन्ध गरिएको छ ।मनाङका किट्स म्यानेजर शिव लामालाई लिगका सबै खेलमा प्रतिबन्ध गर्दै १० हजार जरिवाना गरिएको छ । एन्फाले दुवै क्लबलाई समान ५० हजार जरिवाना गरेको छ ।