सनराइज बैंकको शाखा नुवाकोटको बट्टारमा

नुवाकोट सनराइज बैंक लिमिटेडले नुवाकोटको विदुर नगरपालिका वडा नम्बर ४ बट्टारमा १२८ औं शाखा संचालनमा ल्याएको छ ।

बैंकले आइतबार आयोजित एक कार्यक्रममा प्रतिनिधिसभाका सांसद नारायणप्रसाद खतविडा, विदुर नगरपालीकाका मेयर सञ्जु पण्डित र सनराइज बैंकका प्रमुख कार्यकारी अधिकृत जनक शर्मा पौड्यालले संयुक्त रुपमा शाखा कार्यालयको उद्घाटन गरेका हुन । कार्यक्रममा प्रतिनिधि सभाका सांसद नारायणप्रसद खतिवडाले बैक स्थापनाले सेवामा प्रतिस्पर्धा बृद्धि भई ग्राहकले फाईदा पाउने बताए ।

उनले बैकलाई नाफामुखी भन्दापनि सेवामुखी भएर व्यापार गर्न आग्रह गरे । कार्यक्रममा विदुर नगरपालिकाका मेयर सञ्जु पण्डितले बैकहरु सहर केन्द्रित भएको भन्दै गाउँगाउँमा पुगेर सेवा गर्नुपर्ने बताए । उनले बैक तथा वित्तिय संस्थाले स्थानिय सरकारसँग समन्वय नगरी काम गर्ने गरेको भन्दै असन्तुष्टि व्यक्त गरे ।

त्यस्तै नुवाकोट उद्योग वाणिज्य संघका अध्यक्ष ताराबहादुर कार्कीले बैक र उद्योग व्यवसायीको सम्बन्ध नङ र मासुकोजस्तै रहेको भन्दै बैक तथा वित्तिय संस्थाले व्यापार व्यवसायमा लगानी गर्दा विशेष सहुलियत दिनुपर्ने बताए । कार्यक्रममा बैंकका सिइओ जनक शर्मा पौड्यालले सर्वसाधारणमा बचत गर्ने बानीको विकास गर्न अनुरोध गदै उक्त बचतलाई बैंक मार्फत लगानी गर्न प्रोत्साहन गरे । आफ्ना ग्राहकहरुलाई सेवा र सुविधा उपलब्ध गराउने अभिप्रायका साथ सनराइज बैंकले देशका विभिन्न भागमा शाखा विस्तार गर्दै आइरहेका पौडेलले बताए ।

सनराइज बैंकले हाल १२८ वटा शाखा, ३९ वटा शाखारहित बैंकिङ्ग सेवा, ८ वटा एक्सटेन्सन काउण्टर र १४५ वटा ए.टि.एम मार्फत आफ्ना करिब ६ लाख ग्राहकहरुलाई सेवा प्रदान गर्दै आइरहेको छ ।