रसुवाको धुन्चेमा जरायो नाच देखाइयो

रसुवा । रसुवाको सदरमुकाम धुन्चेका युवाहरूको सक्रियतामा जरायो नाच देखाइएको छ । हरेक दुई वर्षमा प्रस्तुत हुने नाच बिहीबार देखाइएको हो । जीव जनावरलाई मार्न नहुने सन्देश दिँदै नाच प्रस्तुत गर्ने गरिएको छ । विगत दुई वर्षदेखि रसुवा संरक्षण तथा सांस्कृतिक कला समूहले नाच प्रस्तुत गर्दै आएको छ ।

यो नाच चेन क्षेवाअन्तर्गत पर्छ । यसमा धेरै किसिमका नाच समावेश गरिएको हुन्छ । धुन्चेमा खम्बा र जरायो नाच देखाउने गरिएको समूहका सचिव कमल तामाङले बताए  ।‘चार दशकसम्म नाच प्रस्तुत हुन नसकेपछि दुई वर्षअघिबाट यसको सुरुवात गरेका हौं’, उनले भने , ‘यसलाई हामीले निरन्तरता दिँदै जाने छौं ।’ २०३५ सालसम्म यो नाच प्रचलनमा थियो ।

धुन्चेमा लामो समयसम्म नाच प्रस्तुत हुन नसकेको समयमा जिल्लाको अन्य क्षेत्रमा भने नाच प्रस्तुत हुँदै आएको थियो । यो नाच जिल्लाको ठुलो भार्खु, गत्लाङ, गोल्जुङ, चिलिमे र खाम्जिङमा समेत देखाइँदै आएको छ । ठुलो भार्खुमा भाइटीकाको भोलिपल्ट र अन्य स्थानमा फरक फरक महिनामा नाच देखाइने गरिएको छ । नाच देखाउनका लागि धुन्चेमा चार ओटा समुह बनाइएको छ । एउटा समुहमा २६ देखि २८ घरधुरी समावेश गरिएको छ । यो नाच वन्यजन्तु संरक्षणका लागि लामाले खेल्ने भूमिकाको बारेमा केन्द्रित छ ।

यसमा लामा, झाँक्री र जरायोको मुख्य भूमिका हुन्छ । सिकारीहरू सिकार खेल्न जाँदा लुकेर बसेको जरायो भाग्छ । भागेर गएको जरायो लामाको शरणमा पुग्छ । सिकारीहरू लामा कहाँ पुगेर जरायो खोजिदिन आग्रह गर्छन । वन्यजन्तुको सिकार गर्न नहुने सन्देश लामाले दिएपछि सिकारीले सबै हतियार लामालाई बुझाउँछन् । लामाले काटमार नगर्ने भएकाले सबै जनावरले लामाप्रति गर्ने विश्वास र सम्बन्ध देखाउनका लागि यो नाच देखाइन्छ ।