देबिघाटको बेचिएको झोलुङ्गे पुलमा अख्तियारको चासो

नुवाकोट । विदुर नगरपालिका वडा नम्बर ५ र बेलकोटगढी नगरपालिका वढा नम्बर ८ जोड्ने झोलुङ्गे पुल बित्री प्रकरणमा अख्तियार दुरुपयोग अनसन्धान आयोगले चासो देखाएको छ ।

पुल बिक्री प्रकरण व्यापक भएपछि गत साता अख्तियारको टोली अनुगमनको लागि नुवाकोट आएको विदुर नगरपालिका स्रोतले जनाएको छ । अख्तियारको टोलीले पुल अनुगमन गर्दै विदुर नगरपालिका वडा नम्बर ५ र बेलकोटगढी नगरपालिका वडा नम्बर ८ बाट कागजात लगेको बेलकोटगढी नगरपालिका वडा नम्बर ८ का वडाअध्यक्ष भोजप्रसाद पुडासैनीले विदुर खबरलाई बताए ।

अख्तियारको टोलीले विदुर नगरपालिका प्रतिनिधि,बेलकोटगढी नगरपालिकाका प्रतिनिधि र स्थानियबासीसँग सोधपुछ गरेको बताइएको छ । टोलीले पुलको मुचुल्का समेत उठाएर लगेको विदुर नगरपालिकका एक कर्मचारीले बताए ।
यस अघि विदुर नगरपालिका वडा नम्बर ५ का वडाअध्यक्ष चित्रकार र बेलकोटगढी नगरपालिका वडा नम्बर ८ का वडाअध्यक्ष पुडासैनीले ७० हजारमा देबिघाट जिलिङ जोड्ने पुल गल्छी–त्रिशुली–मैलुङ–रसुवागढी सडकले योजनाले काटेर फालेपछि कवाडीलाई बेचेर नगरपालिकामा राजश्व दाखिला गरेका थिए ।